鄰近麗晶花園嘅九龍灣公園交通尚算方便，居住九龍區嘅家長不妨留意一下，公園內主要由8字形高架單車徑、初學者單車練習區、暫緩區、圓形遊樂空地組成，為初學小朋友及喜歡挑戰嘅小車手提供合適嘅空間踩車。
8字形高架單車徑
8字形高架單車徑不乏上斜路段，斜度唔算太大，家長亦可以放心俾小車手征服整條單車徑，要留意嘅係，8字形高架單車橋只供單車使用，冇踩車嘅家長係唔可以跟埋上去㗎，如果家長臨時想同小朋友踩番轉，唔洗擔心，可以喺單車租賃亭揀番架啱嘅單車，一齊享受高架單車徑嘅樂趣。
初學者單車練習區
初學者單車練習區相對高架單車徑則平路較多，初學小朋友也可以輕鬆掌握，家長亦可以在旁陪伴，踩熟咗之後想小小挑戰下又怕架空單車徑難度太高？其實除咗平路之外，初學者練習區都有兩個附有刻度嘅小斜坡，不妨紀錄一下每次踩到嘅斜度，就知道有冇進步啦，玩到攰，記得去暫緩區抖下喇！
遊樂場設施
踩車踩到攰仲可以去埋旁邊嘅遊樂場，遊樂場設施一樣咁豐富，包括七人人造草地足球場、十一人天然草地足球場暨欖球場、兒童遊樂場、太極園及卵石徑，適合大人小朋友一齊玩！
園內設有飲水區，亦有單車租借服務，每小時HK$40。開放時間為每日早上7時至晚上11時
交通方法
由九龍灣港鐵站轉乘專線小巴 51M 號或步行 15-20 分鐘
乘坐巴士 5D, 107, 13X, 15A, 24, 28B, 74A, 107, 224X, 641
乘坐專線小巴 51M 號、56 號、46 號
公園附近設有收費停車場
Jollymap all right reserved
