最後一日 FIVB世界女排聯賽2018 - 香港站 完滿落幕。阿根廷對日本嘅頭場比賽，日本輪換咗一班今站少出場嘅 新鍋理沙、岩坂名奈、古賀紗理那 等球員。最後，日本以局數3:0擊敗位於榜尾嘅阿根廷，今站以兩勝一負嘅成績完成，喺聯賽榜穩守第9位。阿根廷則今站賽事全敗。

而到今站賽事重頭戲「中意大戰」，中國首兩局一直處於劣勢，一直被意大利㩒住嚟打，而朱婷只可以喺後場穩守，甚少參與進攻。而衝住朱婷而嚟嘅意大利球手 - 伊千奴 就不停搵到機會進攻，帶領意大利先贏兩局，令中國喺今站首次喺首局落敗。到第三局 - 意大利決勝局，中國掌握到比賽節奏，發力阻止意大利勝出，終於於第三局取勝。

可惜好景不常，意大利又再次搵到中國嘅缺口，起勢攻擊。最終，中國未能把握機會，比意大利今局取得25:18成績，以局數3:1取得今場勝利。兩隊都以兩勝一負成績完成今站賽事。喺聯賽榜方面，中國經過今站成功升上第6位。而意大利則升上聯賽榜第8位。

喺賽後記者會，朱婷表示今站比賽有好有壞，佢地會努力加以訓練，務求加強己隊實力。佢被記者問到自己喺今站表現點樣，佢就搞笑咁講:「呢個問題你應該問觀眾」。而意大利隊長 - 姬莉婕拉 就表示好高興可以取得好成績，今仗表現都好好。

被問到中國隊教練 - 郎平有關今仗輸波嘅問題，佢就話意大利今場贏得相當精彩，亦都承認喺攻防上面嘅不足，特別係對住意大利18號球員 - 伊千奴，希望可以訓練改善問題。佢更認為今仗朱婷受到意大利嘅特別照顧，令佢打得好唔舒服，降低佢嘅攻擊力，令己隊對對方嘅威脅大大降低。完結前，郎平教練更特登多謝一班支持中國女排嘅觀眾，認為觀眾嘅打氣聲係佢地嘅動力來源，而呢一個地方同埋觀眾嘅支持，讓中國隊感覺到有家嘅感覺。而意大利主帥 - Davide Mazzanti 則表示呢一場比賽係相當順利，佢地能夠實行到所有戰術，走到成功嘅呢一步。佢好感謝現場所有嘅人，包括工作人員嘅安排，令所有事都好順利。佢都非常多謝在場觀眾嘅打氣聲，覺得觀眾相當熱情，好鍾意香港。被記者問到擔唔擔心嚟緊下一站嘅比賽，因為佢地會遇上較強嘅荷蘭同塞爾維亞，同埋有冇信心打入決賽。佢就話，喺今屆第一場比賽，佢就發覺到隊中嘅問題。作為宜家位處聯賽榜第8嘅佢地，佢都相當擔心嚟近下一站嘅成績。如果要打入決賽，佢地好可能需要贏多8-9場先有機會。所以佢地會盡一切努力去做好。

中國隊喺下週賽事將會翻到主場，並會遇上巴西、美國以及俄羅斯。