【吳安儀的偶像是誰？】
2015 WLBSA世界職業桌球錦標賽女子個人冠軍- Onyee Ng 吳安儀。這位充滿正能量的球手對自己的評價竟然是：「我係一個桌球小學雞。」
「我細個讀書唔叻，爸爸見到我成日匿埋係屋企打機好擔心。佢會帶埋我去睇佢打桌球比賽。我覺得爸爸着住套紳士服好有型，所以都想好似佢咁有型！爸爸喺桌球室打工，佢個老闆都覺得我好有心機打波。17歲讀完中五，我就決定同爸爸一齊返工。2009年，我代表香港去印度打業餘世界錦標賽攞到冠軍之後，2010年轉咗做全職運動員。」
由小時候跟隨父親參加業餘大師賽，至長大後獨當一面東征西討，安儀視每場比賽為寶貴的學習機會。「現在多咗機會同世界級球手對打。上年試過喺 World Championships Qualifiers 對過 Peter Lines，喺表演賽對丁俊輝及 James Wattana。開始時對住比自己水平高嘅球手會有壓力，後來打得多，漸漸從佢哋嘅打法同技術學到好多以前學唔到嘅嘢，包括適應緊張氣氛。學到唔怕輸，反而覺得輸會學到更多。我最記得 2015年 World Championships 四強嘅對手係10屆世界冠軍Reanne Evans。我贏四比二，好開心但要抑壓住情緒，唔可以掉以輕心，因為兩個鐘後就要打決賽。點知去到決賽一開始我輸緊二比零，即刻變得好緊張。我叫球證暫停畀我去洗手間。其實我係去咗冷靜自己，叫自己唔好諗輸贏，專注打波啦。冷靜之後，我發揮到最佳水準，連贏六鋪，贏埋個冠軍！」
吳安儀非常感謝家人的栽培及朋友的支持，讓她充滿正能量。「現在輸波雖然都會唔開心，但唔會好似細個咁即刻對住爸爸喊。唔開心嘅時間唔會超過幾分鐘，睇法會正面咗。我會理性地同教練分析比賽，諗吓下次點樣做好啲。近幾年我哋師兄師姐攞咗好多好成績，香港體育學院亦多咗資源投放於專業科技配套設施，培養更多高質素桌球手。我試過去女童院同懲教所，帶埋自己支桌球棍去示範，反應都好好。希望將來可以繼續透過呢啲活動去令更多人接觸桌球運動，培養興趣。其實所有運動從小開始培訓係最理想，所以都好興幸近年多咗桌球校際比賽。」
吳安儀認為擁有最一流桌球配套設施嘅地方係香港。「香港嘅桌球室真係好好質素，無論係冷氣、燈光、濕度都調節得好好，甚至桌球枱用嘅絨面都靚過好多國家。體院最近仲引入咗一套高科技設施，能夠更有效率咁訓練桌球手對白波嘅控制。」安儀亦希望香港可以於不久將來舉辦世界水平嘅桌球盛事。
吳安儀的偶像是誰？「 傅家俊！」
Photo Credit: Gerald Ip
