青衣東北公園
位於青衣担杆山路10號嘅青衣東北公園，佔地5.6公頃，連接青衣海濱公園，亦係香港其中一個大型公園。青衣東北公園集結休憩、康樂及體育用途於一身，為唔同年齡層嘅市民提供各式各樣嘅康樂設施，迎合一家大細嘅需要啊﹗而且青衣東北公園嘅位置亦都鄰近青馬大橋，所以大家都可以欣賞到日落嘅景色。
大型體育設施
運動設施方面提供可以容納200名觀眾嘅11人草地足球場、兩個籃球場暨排球場、門球場、緩跑徑及稍後提及嘅滑板場、單車徑同兒童單車徑等。
休憩及康樂設施
其他康樂設施包括長者健體園地、足健徑、露天廣場、海濱長廊同園景區等等，應有盡有。由於鄰近長發巴士總站，交通亦非常方便，詳情可參考本頁最底嘅交通資訊。
單車及裝備租用
全港親子單車地圖介紹得嘅地方當然唔少得單車相關嘅設備。青衣東北公園內設有單車租用亭，提供單車租賃、售賣及維修服務。
單車及滑板設施
園內有一條大約一公里長嘅單車徑，有高有低，貫穿整個東北公園，絕對唔係平路單徑嘅體驗。所以亦都有青衣單車公園之稱。但注意唔好踩出去海濱長廊同緩跑徑啊！另外亦有一段大約五十米嘅兒童單車徑俾初學者練習。
園內亦有一個相當大嘅滑板場，雖然冇寫到明，但記得幫小朋友戴好晒保護裝備先好入去玩呀！注意滑板場入面唔可以踩單車，而且園內係冇滑板車租借，記得帶埋你嘅愛駕出黎啦。
背山面海景色
除左運動及康樂以外，青衣東北公園亦係攝影發燒友打卡地。青衣東北公園背山面海，後有青衣山景，前有藍巴勒海峽海景。
向西望遠見汀九橋，近看青衣船廠。向東望有荃灣西一帶樓景，除左全港第二高嘅如心廣場亦有近期最熱新樓盤。早有無敵大海景影，晚有燈光閃閃夜景影，鐘意影相嘅你快D夾時間去打卡啦！
交通
私家車﹕園內設有時租停車場
地鐵﹕青衣站落車，穿過青衣城出到海濱長廊。沿住海濱長廊行大約15分鐘，沿路可以欣賞下藍巴勒海峽嘅海景，經過灝景灣、長發邨同青泰苑就會到青衣東北公園架啦！
巴士﹕長發巴士總站落，行大約5分鐘，途經路線包括
41, 41A, 41M, 41P, 42C, 43B, 44, 44M, 49P, 49X, 243M, 948, 948p, A31, E31, E32, N31, N241, X42C
小巴﹕88A, 88E, 401, 402S
附近配套
另外，公園旁藍澄灣商場內有多間食肆，亦有超級市場及便利店，玩得攰可以即刻補給一下！
交通
私家車﹕藍澄灣及盛逸酒店設有時租停車場，入口位於青鴻路迴旋處。
88F 藍澄灣 - 青衣站
88G 藍澄灣 - 葵芳站
Jollymap all right reserved
